ចរិកមហាអំណាច! មេដឹកនាំកូរ៉េខាងជើងទស្សនាការសាកល្បងមីស៊ីលបាញ់ចេញពីនាវាពិឃាតថ្មីខាំងខន 'Kangon'

 

ប្រព័ន្ធផ្សព្វផ្សាយកូរ៉េខាងជើងបានរាយការណ៍កាលពីថ្ងៃអាទិត្យទី 5 ខែកក្កដា ថា មេដឹកនាំកូរ៉េខាងជើង គីម ជុងអ៊ុន បានត្រួតពិនិត្យការសាកល្បងអាវុធរបស់នាវាពិឃាតxAgxn Kangon ទម្ងន់ 5,000 តោន រួមទាំងការសាកល្បងមីស៊ីលបញ្ជា និង "វិធីសាស្ត្រសង្គ្រាមអេឡិចត្រូនិក"។នាវាពិឃាតនេះគឺជានាវាដែលធ្លាប់បានលិចក្នុងពិធីរុញនាវាទៅលើទឹកកាលពីឆ្នាំមុន ប៉ុន្តែត្រូវបានជួសជុលនៅពេលក្រោយរួចរាល់ហើយ។

 ទីភ្នាក់ងារសារព័ត៌មាន KCNA បានរាយការណ៍ថា ការសាកល្បងនេះបានធ្វើឡើងកាលពីថ្ងៃសុក្រទី3 មិនដល់ពីរសប្តាហ៍បន្ទាប់ពីនាវាពិឃាតឆូហយ៉ន Chohyeon ដែលជានាវាចម្បាំងទម្ងន់ 5,000 តោនមួយទៀតបានដាក់ឱ្យដំណើរការ។

 នៅក្នុងពិធីដាក់ឱ្យដំណើរការនេះ មេដឹកនាំគីមបានសន្យាថានឹងបំពាក់អាវុធនុយក្លេអ៊ែរដល់កងទ័ពជើងទឹករបស់គាត់ និងបង្កើតនាវាចម្បាំងថ្មីទម្ងន់ 10,000 តោន។

បន្ទាប់ពីការសាកល្បងអាវុធថ្ងៃសុក្រ (3) គីម ជុងអ៊ុន "បានបញ្ជាឱ្យការធ្វើត្រួតពិនិត្យនាវាពិឃាតអោយបានម៉ត់ចត់ដោយមានការទទួលខុសត្រូវ ហើយត្រូវឱ្យដំណើរការទៅក្នុងកងទ័ពជើងទឹកក្នុងរយៈពេលពីរខែ" នេះបើយោងតាម ​​​​KCNA។

 រូបថតដែលចេញផ្សាយដោយ KCNA បង្ហាញថា គីម ជុងអ៊ុន ពាក់មួកពណ៌លឿងស្រាល កំពុងមើលការធ្វើសាកល្បងអាវុធពីប៉ុស្តិ៍សង្កេតការណ៍ឆ្នេរសមុទ្រ ដោយមានមន្ត្រីឈរក្បែរគាត់ រូបភាពមួយទៀតបានបង្ហាញពីនាវា Kangkon កំពុងបាញ់មីស៊ីលចូលទៅក្នុងសមុទ្រ ដោយមានផ្សែងហុយចេញពីការបាញ់។

បន្ថែមពីលើការបញ្ជាក់ពីតម្រូវការក្នុងការពង្រឹង "ឧបករណ៍ទប់ស្កាត់សង្គ្រាម" របស់ប្រទេស លោកគីម ជុងអ៊ុន ក៏បានសន្យាថានឹងបង្ហាញពីការប្តេជ្ញាចិត្តរបស់កូរ៉េខាងជើងក្នុងការសម្រេចអោយបាន "អំណាចដាច់ខាត" នេះបើយោងតាម ​​KCNA។

នាវា Kangkon បានជួបប្រទះគ្រោះថ្នាក់កាលពីខែឧសភាឆ្នាំមុន បានក្រឡាប់ដោយផ្នែកខ្លះបន្ទាប់ពីផ្អៀងចូលទៅក្នុងទឹកក្នុងអំឡុងពេលរុញនាវាទៅលើទឹក ដែលហេតុការណ៍នេះនៅចំពោះមុខមេដឹកនាំគីម។

លោកគីមបានស្តីបន្ទោសហេតុការណ៏នេះថាជា "ការធ្វេសប្រហែសធ្ងន់ធ្ងរ" និង "ការមិនទទួលខុសត្រូវ" ដោយបញ្ជាឱ្យកាត់ទោសអ្នកដែលពាក់ព័ន្ធ។

អ្នកវិភាគនិយាយថា បញ្ជារបស់លោកគីមឱ្យដាក់ឱ្យដំណើរការនាវាចម្បាំងក្នុងរយៈពេលពីរខែអាចទាក់ទងនឹងខួបនយោបាយដ៏សំខាន់មួយ។

"ដោយពិចារណាលើប្រតិទិននយោបាយរបស់កូរ៉េខាងជើង សេណារីយ៉ូដែលទំនងបំផុតគឺនាវាចម្បាំងនេះនឹងត្រូវបានដាក់ឱ្យដំណើរការនៅខួបលើកទី 78 នៃការបង្កើតប្រទេសនៅថ្ងៃទី 9 ខែកញ្ញា"លោកហុងមីនមកពីវិទ្យាស្ថានបង្រួបបង្រួមកូរ៉េនៅទីក្រុងសេអ៊ូលបានប្រាប់ AFP ។

លោកបានបន្ថែមថា នៅពេលដែលដាក់ឱ្យដំណើរការ នាវាចម្បាំងនេះទំនងជានឹងប្រតិបត្តិការនៅឆ្នេរសមុទ្រខាងកើតនៃឧបទ្វីបកូរ៉េ ទោះជាយ៉ាងណាក៏ដោយ កូរ៉េខាងជើងបច្ចុប្បន្នទំនងជាកំពុងផ្តោតលើការអភិវឌ្ឍជំនាញក្នុងប្រតិបត្តិការឆ្នេរសមុទ្រដែលមានហានិភ័យទាប។

 ទីក្រុងព្យុងយ៉ាងបានប្រកាសម្តងហើយម្តងទៀតថាខ្លួនជារដ្ឋនុយក្លេអ៊ែរ "ដែលមិនអាចត្រឡប់ឡើយ" ចាប់តាំងពីកិច្ចប្រជុំកំពូលឆ្នាំ 2019 រវាងលោកគីមជុងអ៊ុន និងប្រធានាធិបតីអាមេរិកលោកដូណាល់ត្រាំនៅទីក្រុងហាណូយ ប្រទេសវៀតណាមបានបរាជ័យដោយសារតែការមិនចុះសម្រុងគ្នាលើវិសាលភាពនៃការរំសាយអាវុធនុយក្លេអ៊ែរ និងការបន្ធូរបន្ថយទណ្ឌកម្ម។

 កូរ៉េខាងជើងនៅតែស្ថិតក្នុងសង្គ្រាមជាមួយកូរ៉េខាងត្បូង ដោយសារជម្លោះទាំងពីរប្រទេសក្នុងអំឡុងឆ្នាំ 1950-1953 បានបញ្ចប់ដោយបទឈប់បាញ់ តែក៏មិនមែនជាសន្ធិសញ្ញាសន្តិភាពឡើយ។

 កងទ័ពជើងទឹកកូរ៉េខាងត្បូងមាននាវាជាង 10 គ្រឿងដែលមានទម្ងន់ជាង 5,000 តោន ខណៈដែលកូរ៉េខាងជើងមានតែ2គ្រឿងប៉ុណ្ណោះ។

ប្រភព៖ AFP