ប្រទេសចិនអាចផលិតម៉ាស៊ីន Immersion DUV ផ្ទាល់ខ្លួនបានហើយ ASML ធ្លាក់ចុះ 8% ភាគហ៊ុនបន្ទះឈីបសកលរង្គោះរង្គើ Nvidia ឈរតែម្នាក់ឯង

 

ឥឡូវនេះ ប្រទេសចិនអាចផលិតម៉ាស៊ីន Immersion DUV ផ្ទាល់ខ្លួនបានហើយ ASML ធ្លាក់ចុះ 8% និង CXMT ផ្ទុះឡើង IPO 466% - សង្គ្រាមបន្ទះឈីបសកលថ្មីមួយចាប់ផ្តើម ខណៈដែល Nvidia ឈរតែម្នាក់ឯង។

សហរដ្ឋអាមេរិកបានចំណាយពេល4ឆ្នាំសាងសង់ជញ្ជាំងឃាំងបច្ចេកវិទ្យាដើម្បីបន្ថយល្បឿនប្រទេសចិន ប៉ុន្តែលទ្ធផលក្នុងសប្តាហ៍ដដែលនោះគឺ ប្រទេសចិនបានប្រមូលប្រាក់ទុនបាន 8.6 ពាន់លានដុល្លារពី IPO បន្ទះឈីបត្រឹមតែមួយថ្ងៃ ដោយប្រកាសថា ឥឡូវនេះខ្លួនអាចផលិតម៉ាស៊ីនផលិតបន្ទះឈីបដ៏សំខាន់បំផុតរបស់ខ្លួនដោយឯករាជ្យ ដោយមិនពឹងផ្អែកលើអឺរ៉ុបទៀតឡើយ បណ្តាលឱ្យទីផ្សារភាគហ៊ុនបន្ទះឈីបលើពិភពលោកធ្លាក់ចុះរណូករណែលភ្លាមៗ នេះមិនមែនជាសង្គ្រាមពាណិជ្ជកម្មដែលបានប្រយុទ្ធជាមួយពន្ធនាំចូលនោះទេ ប៉ុន្តែជាការប្រឈមមុខដាក់គ្នានៅចំណុចជ្រៅបំផុតនៃខ្សែសង្វាក់ផ្គត់ផ្គង់នៃយុគសម័យឌីជីថល។

មុននឹងចូលទៅក្នុងប្រធានបទសំខាន់ ចង់ជំរាបជូនបន្តិចលើបន្ទះឈីប ឬ semiconductor បន្ទះឈីបគឺជាបន្ទះស៊ីលីកុន silicone sheetតូចមួយដែលមានចរន្តអេឡិចត្រូនិច electronic circuit ពេញនៅក្នុងនោះ ពួកវាជាបេះដូងនៃទូរស័ព្ទចល័ត រថយន្តអគ្គិសនី ម៉ាស៊ីនមេ AI ប្រព័ន្ធធនាគារ និងអាវុធយោធា។ អ្នកណាដែលគ្រប់គ្រងខ្សែសង្វាក់ផ្គត់ផ្គង់បន្ទះឈីបនេះ គឺជាអ្នកគ្រប់គ្រងអនាគតនៃបច្ចេកវិទ្យាសកល។ ចាប់តាំងពីឆ្នាំ 2022 មក ទីក្រុងវ៉ាស៊ីនតោនបានអនុវត្តការគ្រប់គ្រងការនាំចេញ Export Control ជាបន្តបន្ទាប់លើការនាំចេញបច្ចេកវិទ្យាបន្ទះឈីបទៅកាន់ប្រទេសចិន វិធានការទាំងនោះរួមមានការហាមឃាត់ការលក់បន្ទះឈីប Nvidia លំដាប់ខ្ពស់ ការដាក់សម្ពាធលើក្រុមហ៊ុន ASML ដែលជាក្រុមហ៊ុនហូឡង់ ឲ្យបញ្ឈប់ការលក់ម៉ាស៊ីនផលិតបន្ទះឈីបទំនើបៗ និងអូសទាញប្រទេសជប៉ុន និងហូឡង់ឱ្យចូលរួមក្នុងការបិទផ្លូវនេះដែរ។

 ប៉ុន្តែមើលទៅហាក់ដូចជាជញ្ជាំងកំពុងត្រូវបានទម្លុះរន្ធម្តងមួយៗ

ការភ្ញាក់ផ្អើលដំបូងដែលទីផ្សារទប់លែងបានគឺមកពី CXMT ឬ ChangXin Memory Technologies ដែលជាក្រុមហ៊ុនផលិតបន្ទះឈីប DRAM មកពីទីក្រុងហ៊ើហ្វេយ 合肥 Héféi ខេត្ត អាន់ហ៊ុយ 安徽 Ānhuī ប្រទេសចិន។ DRAM ជាអក្សរកាត់ពាក្យ Dynamic Random Access Memory ដែលជាបន្ទះឈីបប្រើសម្រាប់រក្សាទុកទិន្នន័យជាបណ្តោះអាសន្ន ខណៈពេលដែលកុំព្យូទ័រកំពុងដំណើរការ រាល់ពេលដែលបើកកម្មវិធី ទិន្នន័យត្រូវបានផ្ទុកទៅក្នុង DRAM ជាមុនសិន ដើម្បីឱ្យ CPU និង GPU អាចចូលប្រើវាបានយ៉ាងឆាប់រហ័ស ការងារ AI ជាពិសេសការដំណើរការម៉ូដែល AI ធំៗ តម្រូវឱ្យមាន DRAM យ៉ាងច្រើនសន្ធឹកសន្ធាប់។

 CXMT បានចុះបញ្ជីនៅលើទីផ្សារ STAR Market ក្នុងទីក្រុងសៀងហៃកាលពីថ្ងៃទី 27 ខែកក្កដា ជាមួយនឹងតម្លៃ IPO 8.66 យន់ក្នុងមួយហ៊ុន (យន់គឺជារូបិយប័ណ្ណចិន) IPO ផ្សាយលក់មូលបត្រលើកដំបូង នេះ បានប្រមូលទុនសរុបចំនួន 57.92 ពាន់លានយ័ន ឬប្រហែល 8.6ពាន់លានដុល្លារអាមេរិក ធំជាងគេនៅអាស៊ីក្នុងឆ្នាំ 2026។

នៅថ្ងៃជួញដូរដំបូងរបស់ខ្លួន ភាគហ៊ុន CXMT បានកើនឡើង 466%​ ដោយជំរុញឱ្យមូលធនទីផ្សាររបស់ខ្លួនកើនឡើងដល់  3.3 លានលានយ័ន ឬប្រហែល 488 ពាន់លានដុល្លារអាមេរិក ដែលវ៉ាដាច់ធនាគារ ICBC ដែលជាធនាគារធំជាងគេរបស់ប្រទេសចិន ហើយភ្លាមៗនោះបានក្លាយជាក្រុមហ៊ុនដែលមានតម្លៃបំផុតដែលបានចុះបញ្ជីនៅលើផ្សារហ៊ុនចិនភ្លាម។

488 ពាន់លានដុល្លារអាមេរិក គឺប្រហែលពាក់កណ្តាលនៃចំណែកទីផ្សាររបស់ Micron Technology ដែលជាដៃគូប្រកួតប្រជែងរបស់អាមេរិក ដែលបានគ្របដណ្ដប់ទីផ្សារ DRAM ពិភពលោកអស់រយៈពេលជាង 45 ឆ្នាំ  ដែលCXMT ទើបតែត្រូវបានបង្កើតឡើងក្នុងឆ្នាំ 2016 ប៉ុណ្ណោះ មានអាយុត្រឹមតែ10ឆ្នាំប៉ុណ្ណោះ មានទំហំតូចជាងពាក់កណ្តាលនៃទំហំរបស់ Micron ប៉ុន្តែបានតាមទាន់យ៉ាងឆាប់រហ័ស។ បច្ចុប្បន្ននេះ CXMT កាន់កាប់ចំណែកទីផ្សារ DRAM ពិភពលោកចំនួន 7.67% ដែលកើនឡើងពីស្ទើរតែគ្មានកាលពី4ឬ5ឆ្នាំមុន ហើយប្រាក់ចំណូលរបស់ខ្លួននៅក្នុងត្រីមាសទី1នៃឆ្នាំ 2026 បានកើនឡើង 700% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដោយឈានដល់ 50.8 ពាន់លានយន់ ឬប្រហែល 7.5 ពាន់លានដុល្លារអាមេរិក។

តួលេខទាំងនេះបង្ហាញថាតម្រូវការរបស់ប្រទេសចិនសម្រាប់បន្ទះឈីបអង្គចងចាំដែលដំណើរការដោយ AI កំពុងកើនឡើងយ៉ាងខ្លាំង ហើយ CXMT កំពុងក្លាយជាអ្នកផ្គត់ផ្គង់ដ៏សំខាន់ដល់ទីផ្សារក្នុងស្រុក ដោយកាត់បន្ថយការពឹងផ្អែកលើការនាំចូលពីប្រទេសកូរ៉េ ឬសហរដ្ឋអាមេរិក។

 ប៉ុន្តែកាភ្ញាក់ផ្អើលលើកទី2 គួរឱ្យភ័យខ្លាចជាង

ព័ត៌មានដែលបានធ្វើឱ្យទីផ្សារភាគហ៊ុនបន្ទះឈីបពិភពលោករង្គើមិនមែនរឿង CXMT ទេ ប៉ុន្តែជា DUV Lithography ប្រទេសចិនអះអាងថាបានផលិតម៉ាស៊ីនផលិតបន្ទះឈីបដ៏សំខាន់បំផុតមួយនៅក្នុងស្រុក ដោយមិនពឹងផ្អែកលើអឺរ៉ុប។ Lithography គឺជាបេះដូងនៃការផលិតបន្ទះឈីប ដោយប្រើពន្លឺដើម្បីគូរទម្រង់សៀគ្វីតូចៗលើបន្ទះស៊ីលីកុន រលកពន្លឺកាន់តែខ្លី សៀគ្វីកាន់តែលម្អិត និងក្រាស់ មានន័យថាបន្ទះឈីបកាន់តែមានថាមពលខ្លាំងនៅក្នុងតំបន់ដូចគ្នា។ ម៉ាស៊ីនទំនើបបំផុតនៅលើពិភពលោកគឺម៉ាស៊ីន EUV (Extreme Ultraviolet) ដែល ASML នៃប្រទេសហូឡង់គឺជាក្រុមហ៊ុនតែមួយគត់នៅលើពិភពលោកដែលផលិតវា ហើយសហរដ្ឋអាមេរិកបានហាមឃាត់ការលក់ម៉ាស៊ីន EUV ទៅឱ្យប្រទេសចិនអស់រយៈពេលជាច្រើនឆ្នាំ។

 ម៉ាស៊ីនទំនើបបំផុតបន្ទាប់គឺ DUV (Deep Ultraviolet) ជាពិសេសម៉ូដែលដែលមានឈ្មោះថា Immersion DUV ដែលប្រើសារធាតុរាវរវាងកែវ និងបន្ទះស៊ីលីកុន ដើម្បីកែលម្អការឆ្លុះពន្លឺ ដែលអនុញ្ញាតឱ្យមានការគូរសៀគ្វីលម្អិតជាងមុនដោយមិនចាំបាច់ប្តូរទៅពន្លឺ EUV ម៉ាស៊ីន Immersion DUV គឺជាបច្ចេកវិទ្យាមួយដែលប្រទេសចិននៅតែពឹងផ្អែកលើ ASML ហើយការលក់ម៉ូដែលមួយចំនួនត្រូវបានកំណត់។

 ឥឡូវនេះ ប្រទេសចិននិយាយថា ខ្លួនអាចផលិតម៉ាស៊ីន Immersion DUV ក្នុងស្រុកបានហើយ ដោយក្រុមហ៊ុនដែលគាំទ្រដោយរដ្ឋនៅទីក្រុងសៀងហៃ គោលដៅគឺដើម្បីផ្គត់ផ្គង់ម៉ាស៊ីនចំនួន 5 ទៅឱ្យ SMIC, Hua Hong និង CXMT ក្នុងឆ្នាំនេះ ហើយបង្កើនចំនួននោះដល់ 20 ម៉ាស៊ីននៅឆ្នាំ 2027។

 យើងឃើញផលប៉ះពាល់ភ្លាមៗនៅក្នុងទីផ្សារគឺតម្លៃភាគហ៊ុនរបស់ ASML ធ្លាក់ចុះជាង 8% ក្នុងមួយថ្ងៃ  Applied Materials ធ្លាក់ចុះ 4% Lam Research ធ្លាក់ចុះ 4.5% និង KLA ធ្លាក់ចុះ 3% ខណៈដែលវិនិយោគិនបានចាប់ផ្តើមសួរថាតើក្រុមហ៊ុនទាំងនេះនឹងលក់អ្វីទៅឱ្យប្រទេសចិន ប្រសិនបើប្រទេសចិនអាចផលិតម៉ាស៊ីនដោយខ្លួនឯង និងថាតើប្រាក់ចំណូលនាពេលអនាគតនឹងបាត់បង់ប៉ុន្មាន។

 អ្នកវិភាគមួយចំនួនបានជំទាស់នឹងការភ័យស្លន់ស្លោហួសហេតុថា ដោយបញ្ជាក់ថាម៉ាស៊ីន DUV របស់ប្រទេសចិននៅឆ្ងាយពីស្តង់ដាររបស់ ASML នៅក្នុងឆ្នាំ 2025 តែមួយ ASML នឹងផ្គត់ផ្គង់ម៉ាស៊ីន Immersion DUV ចំនួន 131 គ្រឿង និងកាន់កាប់ចំណែកទីផ្សារ 98.7% បើប្រៀបធៀបទៅនឹងគោលដៅរបស់ប្រទេសចិនចំនួន 5 ម៉ាស៊ីននៅឆ្នាំនេះ វាហាក់ដូចជាមិនទាន់ជាមូលហេតុនៃការព្រួយបារម្ភនៅឡើយទេ ប៉ុន្តែចម្លើយនៅក្នុងទីផ្សារភាគហ៊ុនមិនមែនគ្រាន់តែជាថ្ងៃនេះទេ វិនិយោគិនកំពុងសម្លឹងមើលហានិភ័យក្នុងរយៈពេល 5-10 ឆ្នាំខាងមុខ ដោយពិចារណាថាតើប្រទេសចិននឹងអភិវឌ្ឍដល់កម្រិតណា ហើយទិសដៅនោះកាន់តែច្បាស់ឡើងៗ។

 ការភ្ញាក់ផ្អើលទី3មកពីទីក្រុងវ៉ាស៊ីនតោន៖ ក្រុមហ៊ុន Samsung, SK Hynix និង TSMC ដែលជាក្រុមហ៊ុនផលិតបន្ទះឈីបយក្សមកពីប្រទេសកូរ៉េខាងត្បូង និងតៃវ៉ាន់ សុទ្ធតែមានរោងចក្រនៅក្នុងប្រទេសចិន ពីមុន ពួកគេបានទទួលការលើកលែងពិសេសមួយដែលគេស្គាល់ថា  Blanket Waiver ជាការលើកលែងពន្ធពីក្រសួងពាណិជ្ជកម្មសហរដ្ឋអាមេរិក ដែលអនុញ្ញាតឱ្យនាំចូលឧបករណ៍បន្ទះឈីបអាមេរិកសម្រាប់ប្រើប្រាស់នៅក្នុងរោងចក្រចិន ទោះបីជាមាន Export Control ការគ្រប់គ្រងការនាំចេញក៏ដោយ។ប៉ុន្តែឥឡូវនេះ របាយការណ៍របស់ Wall Street Journal បង្ហាញថា លោក Jeffrey Kessler ប្រធានផ្នែកត្រួតពិនិត្យការនាំចេញនៅក្រសួងពាណិជ្ជកម្មសហរដ្ឋអាមេរិក កំពុងរៀបចំលុបចោលការលើកលែងពិសេសទាំងនេះ ប្រសិនបើរឿងនេះកើតឡើង រោងចក្ររបស់ Samsung, SK Hynix និង TSMC នៅក្នុងប្រទេសចិននឹងលែងអាច Upgrade ឬទទួលបានសេវាកម្មជាមួយឧបករណ៍ពីអាមេរិកទៀតទេ។ នេះនឹងបង្ខំឱ្យខ្សែសង្វាក់ផលិតកម្មរបស់ចិនផុតកំណត់បន្តិចម្តងៗ និងមិនអាចប្រកួតប្រជែងបានក្នុងរយៈពេលវែង ព័ត៌មាននេះបានបណ្តាលឱ្យ SK Hynix ធ្លាក់ចុះ 14.65% និង Samsung ធ្លាក់ចុះ 13% នៅក្នុងទីផ្សារកូរ៉េខាងត្បូងកាលពីថ្ងៃទី 27-28 ខែកក្កដា ហើយ Nasdaq 100 ដែលជាសន្ទស្សន៍របស់ក្រុមហ៊ុនបច្ចេកវិទ្យាធំជាងគេទាំង 100 នៅសហរដ្ឋអាមេរិក បានធ្លាក់ចុះ correction (correction គឺនៅពេលដែលសន្ទស្សន៍ធ្លាក់ចុះជាង 10% ពីកម្រិតកំពូលរបស់)។

 នៅក្នុងភ្នក់ភ្លើងតែមួយ តែ Nvidia នៅតែឈរជើងបាន

ទីផ្សារកំពុងបង្ហាញសញ្ញាយ៉ាងច្បាស់ថានៅក្នុងសង្គ្រាមបន្ទះឈីបសកលនេះ Nvidia គឺជាអ្នកទទួលផលធំបំផុត ហេតុផលសាមញ្ញគឺថា Nvidia មិនប្រកួតប្រជែងដោយផ្ទាល់ជាមួយ CXMT ទេ CXMT ផលិតបន្ទះឈីបអង្គចងចាំ DRAM តែ Nvidia ផលិត GPU ឬអង្គភាពដំណើរការក្រាហ្វិក ជាបន្ទះឈីបដែលដំណើរការភារកិច្ច AI ដោយផ្ទាល់ ក្រុមហ៊ុនទាំងពីរនេះស្ថិតនៅក្នុងទីផ្សារខុសគ្នាទាំងស្រុង។

បើនិយាយអោយងាយយល់គឺ CXMT ផលិតធុងទឹក ហើយ Nvidia ផលិតម៉ាស៊ីនបូមទឹក ទោះបីជាពួកគេស្ថិតនៅក្នុងប្រព័ន្ធដូចគ្នាក៏ដោយ ក៏ពួកគេមិនប្រកួតប្រជែងដើម្បីអតិថិជនដែរ ហើយនៅពេលដែលប្រទេសចិនអភិវឌ្ឍ AI កាន់តែច្រើន ក៏ត្រូវការម៉ាស៊ីនបូមដែលមានថាមពលខ្លាំងជាងមុន ដូច្នេះតម្រូវការសម្រាប់ GPU របស់ Nvidia កំពុងកើនឡើងយ៉ាងខ្លាំង ទោះបីជាការលក់ដោយផ្ទាល់ទៅកាន់ប្រទេសចិនត្រូវបានដាក់កម្រិតក៏ដោយ Export Control  តែប្រទេសដទៃទៀតនៅជុំវិញពិភពលោកដែលមិនស្ថិតនៅក្រោមExport Control អាចបន្តទិញ Nvidia ដើម្បីដំណើរការ AI ដូចធម្មតា។

AMD, Intel និង Micron រងផលប៉ះពាល់ខ្លាំងជាងនេះទៅទៀត ពីព្រោះក្រុមហ៊ុនទាំង3នេះប្រកួតប្រជែងដោយផ្ទាល់នៅក្នុងទីផ្សារដែល CXMT កំពុងវាយលុកចូល ហើយពួកគេក៏កំពុងរងសម្ពាធពីសហរដ្ឋអាមេរិកផងដែរ ដែលបង្ខំពួកគេឱ្យកាត់ផ្តាច់ទំនាក់ទំនងជាមួយប្រទេសចិន ពួកគេកំពុងត្រូវបានកាត់ផ្តាច់ចេញពីភាគីទាំងពីរក្នុងពេលតែមួយ។

សម្រាប់ប្រទេសនៅក្នុងតំបន់នេះ ដែលត្រូវប្រុងប្រយ័ត្ន របាយការណ៍មួយដោយ Eco-Business និងទីភ្នាក់ងារសន្តិសុខអាមេរិកបានបង្ហាញថា ក្រុមហ៊ុនមួយនៅទីក្រុងបាងកក ដែលមានទំនាក់ទំនងជាមួយគម្រោង AI ជាតិរបស់ប្រទេសថៃ ត្រូវបានគេសង្ស័យថាអាចនឹងជួយផ្ទេរម៉ាស៊ីនមេដែលមានតម្លៃរាប់ពាន់លានដុល្លារដោយប្រើប្រាស់បន្ទះឈីប Nvidia ទៅឱ្យក្រុមហ៊ុនចិន រួមទាំងក្រុមហ៊ុន Alibaba ផងដែរ។

ប្រសិនបើរឿងនេះត្រូវបានបង្ហាញឱ្យឃើញការពិត ប្រទេសថៃអាចប្រឈមនឹងហានិភ័យនៃការដាក់ទណ្ឌកម្មដោយសហរដ្ឋអាមេរិកក្នុងទម្រង់ជាទណ្ឌកម្មបន្ទាប់បន្សំ Secondary Sanctions ដែលជាវិធានការដែលសហរដ្ឋអាមេរិកប្រើដើម្បីកាត់ផ្តាច់ប្រទេសទីបីពីការចូលប្រើបច្ចេកវិទ្យាអាមេរិក ទោះបីជាប្រទេសនោះមិនមែនជាគោលដៅចម្បងក៏ដោយ ផលប៉ះពាល់គឺ ក្រុមហ៊ុន និងភ្នាក់ងារថៃមិនអាចទិញបន្ទះឈីប Nvidia ឬប្រើប្រាស់សេវាកម្ម cloud AI របស់អាមេរិកបានទេ នេះប៉ះពាល់ដោយផ្ទាល់ទៅលើថ្លៃដើមនៃការអភិវឌ្ឍបច្ចេកវិទ្យានៅក្នុងប្រទេស។

នេះមិនត្រឹមតែប៉ះពាល់ដល់ប្រទេសថៃប៉ុណ្ណោះទេ ប្រទេសសិង្ហបុរី និងម៉ាឡេស៊ីបានក្លាយជាច្រកទ្វារសម្រាប់ប្រទេសចិនក្នុងការនាំចូលម៉ាស៊ីនផលិតបន្ទះឈីបដែលសហរដ្ឋអាមេរិកបានហាមឃាត់ការលក់ដោយផ្ទាល់អស់រយៈពេលជាច្រើនឆ្នាំ។ នៅឆ្នាំ 2025 ប្រទេសចិនត្រូវបានគេរំពឹងថានឹងនាំចូលឧបករណ៍បន្ទះឈីបដែលមានតម្លៃ 5.7 ពាន់លានដុល្លារពីប្រទេសសិង្ហបុរី និង 3.4 ពាន់លានដុល្លារពីប្រទេសម៉ាឡេស៊ី ដែលច្រើនជាងទ្វេដងនៃចំនួនទឹកប្រាក់ពីឆ្នាំមុន ប្រទេសថៃខ្លួនឯងកំពុងព្យាយាមទាក់ទាញការវិនិយោគនៅក្នុងឧស្សាហកម្ម semiconductor ប្រសិនបើត្រូវបានយល់ឃើញថាជាបណ្តាញសម្រាប់ការផ្ទេរបច្ចេកវិទ្យាហាមឃាត់ វិនិយោគិនបរទេសដែលចង់បង្កើតរោងចក្រផលិតបន្ទះឈីបនៅក្នុងប្រទេសថៃនឹងមានការប្រុងប្រយ័ត្ន ហើយមើលទៅកន្លែងផ្សេងជំនួសវិញ។

 រូបភាពធំជាងនេះគឺពិភពលោកកំពុងបំបែកទៅជាប្រព័ន្ធអេកូឡូស៊ីបន្ទះឈីបពីរដែលមិនចូលគ្នា នៅខាងសហរដ្ឋអាមេរិក មាន Nvidia, AMD, Intel, TSMC, Samsung និង SK Hynix ហើយនៅខាងចិន មាន CXMT, SMIC និង Hua Hong ដែលទាំងអស់កំពុងកសាងខ្សែសង្វាក់ផ្គត់ផ្គង់របស់ពួកគេពីដំបូង ជាជំហានៗ។ នាពេលអនាគត កម្មវិធី AI ដែលបង្កើតឡើងដោយប្រទេសចិននឹងដំណើរការលើបន្ទះឈីប ម៉ាស៊ីនមេចិន និងប្រព័ន្ធចិន ខណៈពេលដែលលោកខាងលិចកំពុងកសាងពិភពលោកផ្ទាល់ខ្លួន។

វាស្រដៀងគ្នាទៅនឹងរបៀបដែលប្រទេសចិនបានបង្កើតអ៊ីនធឺណិតផ្ទាល់ខ្លួនតាមរយៈ Great Firewall ដោយបំបែកចេញពីអ៊ីនធឺណិតសកល ប៉ុន្តែលើកនេះវាកាន់តែជ្រៅទៅទៀត ដោយទៅកម្រិតhardware កម្រិតស្ថាបត្យកម្មបន្ទះឈីប និងកម្រិតស្តង់ដារការតភ្ជាប់ វិនិយោគិន និងក្រុមហ៊ុនបច្ចេកវិទ្យាដែលត្រូវធ្វើអាជីវកម្មជាមួយភាគីទាំងពីរនឹងឈឺជាងគេ ពីព្រោះវាតម្រូវឱ្យមានការកសាង និងថែរក្សាហេដ្ឋារចនាសម្ព័ន្ធពីរឈុតសម្រាប់ពិភពលោកពីរដែលមិននិយាយគ្នា។

 រឿងដែលហួសចិត្តបំផុតនោះគឺនយោបាយExport Control ការគ្រប់គ្រងការនាំចេញរបស់សហរដ្ឋអាមេរិក ខណៈពេលដែលធ្វើឱ្យប្រទេសចិនបន្ថយពេលក្នុងរយៈពេលខ្លី តែធ្វើឱ្យប្រទេសចិនគ្មានជម្រើសអ្វីក្រៅពីការអភិវឌ្ឍផ្ទាល់ខ្លួន ហើយនៅពេលដែលប្រទេសចិនសម្រេចបានសូម្បីតែមួយកម្រិតនៃការអភិវឌ្ឍ បណ្តាលឱ្យទីផ្សារភាគហ៊ុនសហរដ្ឋអាមេរិកប្រែប្រួលខ្លាំងជាងពេលដែលមិនមានការប្រកួតប្រជែងទាល់តែសោះ ជញ្ជាំងដែលសហរដ្ឋអាមេរិកបានសាងសង់មិនបានបញ្ឈប់ប្រទេសចិនទេ ប៉ុន្តែផ្ទុយទៅវិញដូចបានបង្កើនល្បឿនការអភិវឌ្ឍរបស់ចិនលឿនជាងមុន។

ចំពោះការចំណាយនាពេលអនាគត សង្គ្រាមនេះនឹងធ្វើឱ្យបន្ទះឈីបមានតម្លៃថ្លៃជាងសម្រាប់ភាគីទាំងអស់ ជំនួសឱ្យខ្សែសង្វាក់ផ្គត់ផ្គង់សកលដែលមានប្រសិទ្ធភាព  supply chain និងចែករំលែកធនធាន ភាគីនីមួយៗត្រូវវិនិយោគលើសលប់ក្នុងការសាងសង់អ្វីៗគ្រប់យ៉ាងដោយខ្លួនឯងដោយមិនចែករំលែក  វាដូចជាទីក្រុងពីរនៅក្បែរគ្នាតែកំពុងសាងសង់រោងចក្រថាមពលផ្ទាល់ខ្លួន ដោយមិនឱ្យការចែករំលែកថាមពលគ្នាប្រើ ធនធានត្រូវបានប្រើប្រាស់ទ្វេដងតែលទ្ធផលដូចគ្នា នៅពេលដែលតម្លៃបន្ទះឈីបកើនឡើង ការចំណាយលើ AI ក៏កើនឡើង ទីបំផុតទំនិញ និងសេវាកម្មដែលអ្នកប្រើប្រាស់ប្រើប្រាស់ក៏នឹងកើនឡើងផងដែរ ហើយនោះជាអថេរដែល Fed ធនាគារកណ្តាលសហរដ្ឋអាមេរិកត្រូវតែពិចារណានៅពេលគណនាអត្រាការប្រាក់ ពីព្រោះប្រសិនបើតម្លៃបច្ចេកវិទ្យាមិនថយចុះ អតិផរណានឹងមិនធ្លាក់ចុះយ៉ាងងាយស្រួលនោះទេ។

មានសញ្ញាច្បាស់លាស់2ដែលត្រូវតាមដាននៅពេលអនាគត ទី1គឺរបាយការណ៍ប្រាក់ចំណូលនាពេលខាងមុខរបស់ Nvidia ប្រសិនបើតួលេខមានភាពវិជ្ជមាន ហើយ guidance នៅតែខ្ពស់បន្តបន្ទាប់នឹងបញ្ជាក់ថាទីផ្សារបានបកស្រាយយ៉ាងត្រឹមត្រូវថា GPU គឺជាបន្ទះឈីបដែលមិនរងផលប៉ះពាល់ដោយ CXMT ហើយការអភិវឌ្ឍ AI បន្ថែមទៀតពីប្រទេសចិននឹងមានប្រយោជន៍សម្រាប់ Nvidia។  ប្រសិនបើguidance ចុះខ្សោយ រឿងរ៉ាវនឹងកាន់តែស្មុគស្មាញ។

ទី2 អាស្រ័យលើថាចំនួនម៉ាស៊ីន Immersion DUV របស់ប្រទេសចិនពិតជាឈានដល់ 5 គ្រឿងនៅចុងឆ្នាំនេះឬអត់ ប្រសិនបើពួកគេធ្វើ នោះផែនការ 20 គ្រឿងសម្រាប់ឆ្នាំ 2027 កាន់តែគួរឱ្យទុកចិត្ត ហើយនោះនឹងចាប់ផ្តើមធ្វើឱ្យខូចប្រាក់ចំណូលនាពេលអនាគតរបស់ ASML ដូចដែលទីផ្សារមានការព្រួយបារម្ភ។

អត្ថបទ ៖ សេនាមេឃ