តើប្រទេសណាខ្លះក្នុងទ្វីបអឺរ៉ុបដែលកំពុងអនុវត្តការចូលបម្រើកងទ័ព ឬការរើសកងទ័ពស្ម័គ្រចិត្តបន្ទាប់ពីការឈ្លានពានអ៊ុយក្រែនទ្រង់ទ្រាយធំរបស់រុស្ស៊ី?

 

ប៊ុនឌីថាក(Bundestag) ឫរដ្ឋសភាអាល្លឺម៉ង់បានបោះឆ្នោតណែនាំអោយប្រើប្រព័ន្ធសេវាកម្មយោធាស្ម័គ្រចិត្ត ដើម្បីពង្រឹងការការពារជាតិបន្ទាប់ពីការឈ្លានពានអ៊ុយក្រែនទ្រង់ទ្រាយធំរបស់រុស្ស៊ី។

នេះតំណាងឱ្យការផ្លាស់ប្តូរដ៏សំខាន់មួយនៅក្នុងគោលនយោបាយយោធាអាល្លឺម៉ង់ និងស្របនឹងការជំរុញរបស់អធិការបតី Friedrich Merz ដើម្បីបង្កើតកងទ័ពដែលមានប្រវត្តិដ៏រឹងមាំបំផុតនៅទ្វីបអឺរ៉ុប។

 ការផ្លាស់ប្តូរនេះនឹងតម្រូវឱ្យចាប់ផ្តើមពីខែមករា ឆ្នាំ2026 យុវជនអាយុ 18 ឆ្នាំទាំងអស់នៅក្នុងប្រទេសអាល្លឺម៉ង់ នឹងត្រូវបានផ្តល់កម្រងសំណួរមួយសួរថាតើពួកគេចាប់អារម្មណ៍ និងមានឆន្ទៈក្នុងការចូលរួមយោធាដែរឬទេ។ ទម្រង់បែបបទនេះនឹងជាកាតព្វកិច្ចសម្រាប់បុរស និងជាការស្ម័គ្រចិត្តសម្រាប់ស្ត្រី។

 សមាជិកសភាអាល្លឺម៉ង់បានបោះឆ្នោតគាំទ្រការផ្លាស់ប្តូរសេវាកម្មយោធាក្នុងសំឡេង 323 ទល់នឹង 272 ដែលធ្វើឱ្យអាល្លឺម៉ង់ក្លាយជាប្រទេសអឺរ៉ុបចុងក្រោយបង្អស់ដែលបានអនុម័តប្រព័ន្ធសេវាកម្មយោធាថ្មីមកប្រើ។ ការបោះឆ្នោតនេះបានកើតឡើងចំពេលមានការតវ៉ារបស់សិស្សនៅតាមសាលារៀនអាល្លឺម៉ង់។

កាលពីខែមុនប្រទេសបារាំងក៏បានប្រកាសពីការណែនាំអំពីការហ្វឹកហ្វឺនយោធាស្ម័គ្រចិត្តរយៈពេល 10 ខែសម្រាប់យុវជនអាយុ 18 និង 19 ឆ្នាំ។

រដ្ឋាភិបាលបារាំងនិយាយថា ខ្លួននឹងខិតខំធ្វើឱ្យការបម្រើយោធាស្ម័គ្រចិត្តឱ្យបានយូរតាមដែលអាចធ្វើទៅបាន ប៉ុន្តែចាប់ពីខែកក្កដា ឆ្នាំ 2027 បុរសទាំងអស់ដែលមានអាយុ 18 ឆ្នាំនឹងត្រូវឆ្លងកាត់ការពិនិត្យរាងកាយដើម្បីវាយតម្លៃការត្រៀមខ្លួនរបស់ពួកគេសម្រាប់ការបម្រើយោធានាពេលអនាគត។

បណ្តាសមាជិកអង្គការសន្ធិសញ្ញាអាត្លង់ទិកខាងជើងឫ (NATO) ដ៏មានឥទ្ធិពលមួយចំនួនរបស់អឺរ៉ុបកំពុងពង្រឹងកងកម្លាំងប្រដាប់អាវុធរបស់ពួកគេតាមរយៈកម្មវិធីបម្រើយោធាស្ម័គ្រចិត្ត។

កងទ័ពដែលឆ្លងកាត់ការជ្រើសរើសទាហានទ្រង់ទ្រាយធំគឺជាលក្ខណៈពិសេសរបស់សមាជិក NATO ក្នុងអំឡុងសង្គ្រាមត្រជាក់ ប៉ុន្តែចំនួនកងទ័ពរបស់ពួកគេបានថយចុះបន្ទាប់ពីការដួលរលំនៃសហភាពសូវៀត។

ទោះជាយ៉ាងណាក៏ដោយ ការឈ្លានពានទ្រង់ទ្រាយធំរបស់រុស្ស៊ីលើអ៊ុយក្រែនក្នុងឆ្នាំ 2022 និងសង្គ្រាមដែលកំពុងបន្តបានជំរុញឱ្យមានការភ័យខ្លាចក្នុងចំណោមប្រទេសសមាជិក NATO អំពីការវាយប្រហាររបស់រុស្ស៊ីនាពេលអនាគត។

នៅក្នុងអត្ថបទនេះ MEK NEWS ស្វែងយល់ពីរបៀបនៃសកម្មភាពជ្រើសរើសទាហានកំពុងកើតឡើងនៅក្នុងប្រទេសចំនួន 30 របស់សមាជិក NATO និងប្រទេសណាខ្លះដែលនៅតែប្រើប្រាស់ការជ្រើសរើសកងទ័ព។

តើប្រទេសណាខ្លះដែលជ្រើសរើសកងទ័ព?

ការចូលបម្រើកងទ័ពត្រូវបានប្រើប្រាស់នៅក្នុងរដ្ឋជាសមាជិកណាតូចំនួន9នៅអឺរ៉ុប៖ ដាណឺម៉ាក អេស្តូនី ហ្វាំងឡង់ ក្រិក ឡាតវី លីទុយអានី ន័រវែស ស៊ុយអែត និងតួកគី។

ប្រទេសតួកគីមានយោធាធំជាងគេទី2នៅក្នុងសម្ព័ន្ធភាពសន្តិសុខNATO បន្ទាប់ពីសហរដ្ឋអាមេរិក។ នៅក្នុងប្រទេសតួកគី បុរសដែលមានអាយុពី 20 ទៅ 41 ឆ្នាំត្រូវបានតម្រូវឱ្យបម្រើកងទ័ពរយៈពេល6ទៅ12ខែ។បើប្រៀបធៀបនឹងប្រទេសន័រវែសបានអោយចូលបម្រើកងទ័ពទាំងបុរស និងស្ត្រី ដោយមានរយៈពេលបម្រើកងទ័ពទូទៅ 12 ខែ។

 ប្រទេសក្រូអាស៊ីមានគម្រោងណែនាំយកការចូលបម្រើកងទ័ពឡើងវិញនៅឆ្នាំក្រោយ ដោយតម្រូវឱ្យបុរសដែលមានអាយុពី 19 ទៅ 29 ឆ្នាំត្រូវឆ្លងកាត់ការបណ្តុះបណ្តាលយោធាជាមូលដ្ឋានរយៈពេល12ខែ។

រដ្ឋជាសមាជិកណាតូផ្សេងទៀតមិនមានការចូលបម្រើកងទ័ពទេ ប៉ុន្តែពួកគេមានកងទ័ពអាជីពមកជំនួសវិញ។

ចក្រភពអង់គ្លេស ដែលមានកម្លាំងយោធាតាំងពីសម័យបុរាណប្រកួតប្រជែងនឹងប្រទេសបារាំង ឬអាល្លឺម៉ង់ (និងរួមជាមួយប្រទេសបារាំង ដែលជាសមាជិកណាតូអឺរ៉ុបតែមួយគត់ដែលមានអាវុធនុយក្លេអ៊ែរ) ពឹងផ្អែកយ៉ាងខ្លាំងទៅលើកងទ័ពអាជីព។អ្វីដែលធ្វើឱ្យចក្រភពអង់គ្លេសមានលក្ខណៈពិសេសក្នុងចំណោមសមាជិកណាតូគឺការជ្រើសរើសយុវជនដែលមានអាយុក្រោម 18 ឆ្នាំ អ្នកដែលមានអាយុចាប់ពី 16 ឆ្នាំអាចចូលរួមជាមួយកងទ័ពដោយមានការយល់ព្រមពីឪពុកម្តាយ។

អាល់បានី សាធារណរដ្ឋឆែក ហុងគ្រី អ៊ីតាលី លុចសំបួរ ម៉ុងតេណេហ្គ្រោ ម៉ាសេដូនខាងជើង ព័រទុយហ្គាល់ ស្លូវ៉ាគី ស្លូវេនី និងអេស្ប៉ាញ សុទ្ធតែមានកងទ័ពអាជីព។

អ៊ីស្លង់មិនមានកងទ័ពអចិន្ត្រៃយ៍ទេ ប៉ុន្តែឆ្មាំសមុទ្ររបស់ខ្លួនអនុវត្តមុខងារការពារជាតិមួយចំនួន។

ផែនទីនេះបង្ហាញពីរដ្ឋជាសមាជិកណាតូអឺរ៉ុបណាខ្លះដែលមានកាតព្វកិច្ចយោធា (ពណ៌ក្រហម)។ ប្រទេសដែលមានកាតព្វកិច្ចយោធារួមមាន ប្រទេសក្រិក តួកគី ហ្វាំងឡង់ ស៊ុយអែត ន័រវែស ដាណឺម៉ាក អេស្តូនី ឡាតវី និងលីទុយអានី (ក្រហមស្រាល) ក្រូអាស៊ី ដែលមានគម្រោងបញ្ចូលការចូលបម្រើកងទ័ពមកប្រើឡើងវិញ(ខៀវ) ប្រទេសដែលមានកាតព្វកិច្ចយោធាស្ម័គ្រចិត្តរួមមាន ប្រទេសបែលហ្ស៊ិក ប៊ុលហ្គារី ប៉ូឡូញ និងហូឡង់ (ខៀវខ្ចី) បារាំង អាល្លឺម៉ង់ និងរ៉ូម៉ានី ដែលមានគម្រោងអនុវត្តកាតព្វកិច្ចយោធាស្ម័គ្រចិត្តមកប្រើ (លឿង) ប្រទេសដែលគ្មានកាតព្វកិច្ចយោធារួមមាន អាល់បានី សាធារណរដ្ឋឆែក ហុងគ្រី អ៊ីស្លង់ អ៊ីតាលី លុចសំបួរ ម៉ុងតេណេហ្គ្រោ ម៉ាសេដូនខាងជើង ព័រទុយហ្គាល់ ស្លូវ៉ាគី ស្លូវេនី អេស្ប៉ាញ និងចក្រភពអង់គ្លេស។ ចំណាំ៖ ប្រទេសមួយចំនួនមានច្បាប់ផ្សេងៗគ្នាសម្រាប់បុរស និងស្ត្រី។

 តើប្រទេសណាខ្លះដែលអោយចូលបំរើយោធាដោយស្ម័គ្រចិត្ត?

កាលពីដើមខែនេះ ក្រសួងការពារជាតិបែលហ្ស៊ិកបានផ្ញើលិខិតទៅកាន់យុវជនអាយុ 17 ឆ្នាំដោយអញ្ជើញពួកគេឱ្យចូលរួមក្នុងយោធា ដោយផ្តល់ប្រាក់ឧបត្ថម្ភប្រហែល 2,000 អឺរ៉ូក្នុងមួយខែ។កម្មវិធីបម្រើកងទ័ពស្ម័គ្រចិត្តរបស់ប្រទេសនេះនឹងចាប់ផ្តើមនៅឆ្នាំក្រោយ គោលដៅគឺដើម្បីបង្កើនចំនួនកងទ័ពបម្រុងនៅក្នុងជួរកងទ័ពពី 6,000 នាក់ដល់ 20,000 នាក់។

 ប្រទេសហូឡង់ ដែលជាប្រទេសជិតខាងរបស់បែលហ្ស៊ិក បាននាំយកការបម្រើយោធាស្ម័គ្រចិត្តចាប់ពីឆ្នាំ 2023 ដើម្បីគាំទ្រដល់កងទ័ពអាជីពរបស់ខ្លួន។

 ប្រទេសប៉ូឡូញ ដែលជារដ្ឋសមាជិកណាតូដ៏ធំបំផុតមួយ បានចាប់ផ្តើមកម្មវិធីបណ្តុះបណ្តាលយោធាមូលដ្ឋានស្ម័គ្រចិត្តរយៈពេលមួយខែនៅឆ្នាំ 2024។ នៅឆ្នាំនេះ នាយករដ្ឋមន្ត្រី Donald Tusk បានប្រកាសពីផែនការរៀបចំ "ការបណ្តុះបណ្តាលយោធាទ្រង់ទ្រាយធំសម្រាប់បុរសពេញវ័យទាំងអស់" នៅក្នុងប្រទេស។

 លោកបានមានប្រសាសន៍ថា "យើងកំពុងនិយាយអំពីតម្រូវការក្នុងការមានកងទ័ពកន្លះលាននាក់នៅក្នុងប្រទេសប៉ូឡូញ រួមទាំងកងទ័ពបម្រុងផងដែរ"។

 នៅឆ្នាំ 2020 ប្រទេសប៊ុលហ្គារីបាននាំយកប្រព័ន្ធសេវាកម្មយោធាស្ម័គ្រចិត្តរយៈពេល6ខែសម្រាប់ពលរដ្ឋដែលមានអាយុក្រោម 40 ឆ្នាំ។

 ចំណែកប្រទេសរ៉ូម៉ានីមានគម្រោងនាំយកប្រព័ន្ធសេវាកម្មយោធាស្ម័គ្រចិត្តរយៈពេល4ខែនៅឆ្នាំក្រោយ។

 តើប្រទេសអាល្លឺម៉ង់មានគម្រោងកសាង "កងទ័ពខ្លាំងបំផុតនៅអឺរ៉ុប" យ៉ាងដូចម្តេច?

ប្រទេសអាល្លឺម៉ង់បានបញ្ចប់ការបម្រើយោធាជាកាតព្វកិច្ចនៅឆ្នាំ 2011 ប៉ុន្តែសភារបស់ខ្លួនឥឡូវនេះបានបោះឆ្នោតគាំទ្រអោយមានទាហានស្ម័គ្រចិត្តជំនួសវិញ។ទោះជាយ៉ាងណាក៏ដោយ ប្រសិនបើស្ថានភាពសន្តិសុខកាន់តែអាក្រក់ទៅៗ ឬមានបេក្ខជនស្ម័គ្រចិត្តមិនគ្រប់គ្រាន់ អាជ្ញាធរអាចពិចារណាលើទម្រង់នៃការចូលបម្រើកងទ័ពជាកាតព្វកិច្ចមកប្រើប្រាស់វិញ។

ច្បាប់ថ្មីរបស់ប្រទេសអាល្លឺម៉ង់នឹងតម្រូវឱ្យបុរសអាយុ 18 ឆ្នាំទាំងអស់បំពេញកម្រងសំណួរដែលបញ្ជាក់ពីឆន្ទៈ និងសមត្ថភាពរបស់ពួកគេក្នុងការចូលរួមជាមួយកងទ័ព ហើយចាប់ផ្តើមពីខែកក្កដា ឆ្នាំ 2027 ពួកគេនឹងត្រូវបានតម្រូវឱ្យឆ្លងកាត់ការពិនិត្យរាងកាយដើម្បីវាយតម្លៃភាពស័ក្តិសមសម្រាប់ការបម្រើយោធារបស់ពួកគេ។

ក្នុងករណីមានសង្គ្រាម យោធាអាល្លឺម៉ង់នឹងអាចប្រើប្រាស់កម្រងសំណួរ និងលទ្ធផលពិនិត្យរាងកាយដើម្បីជ្រើសរើសបេក្ខជនដែលមានសក្តានុពល។ក្នុងករណីមានសង្គ្រាម កងទ័ពអាល្លឺម៉ង់នឹងអាចប្រើប្រាស់កម្រងសំណួរ និងលទ្ធផលពិនិត្យរាងកាយ ដើម្បីជ្រើសរើសបេក្ខជនដែលមានសក្តានុពល។

លោកអធិការបតី Friedrich Nietzsche បាននិយាយថា លោកចង់បង្កើត "កងទ័ពដែលធ្លាប់រឹងមាំបំផុតនៅអឺរ៉ុបឡើងវិញ"។

ផែនការនេះពាក់ព័ន្ធនឹងការពង្រីកកងទ័ពសកម្មចំនួន 183,000 នាក់បច្ចុប្បន្នដល់ 260,000 នាក់នៅឆ្នាំ 2035 រួមជាមួយនឹងកងទ័ពបម្រុងបន្ថែមចំនួន 200,000 នាក់ទៀត។

នៅថ្ងៃទី 5 ខែធ្នូ សិស្សានុសិស្សនៅក្នុងទីក្រុងអាល្លឺម៉ង់ប្រហែល 90ទីក្រុង ទូទាំងប្រទេសបានចូលរួមក្នុងកូដកម្មមិនចូលរៀនដើម្បីតវ៉ាប្រឆាំងនឹងការបោះឆ្នោតលើសេចក្តីព្រាងច្បាប់នេះ ដោយអ្នកខ្លះបានប្រើពាក្យស្លោកថា "កុំឱ្យខ្លួនឯងត្រូវបានប្រើជាកូនអុកក្នុងសង្គ្រាម"។

ការស្ទង់មតិ Forsa ថ្មីៗនេះលើមតិសាធារណៈរបស់អាល្លឺម៉ង់សម្រាប់ទស្សនាវដ្តី Stern បានរកឃើញថា ទោះបីអ្នកឆ្លើយតបឯកសារជាងពាក់កណ្តាលគាំទ្រការចូលបម្រើកងទ័ពជាកាតព្វកិច្ច ប៉ុន្តែការប្រឆាំងបានកើនឡើងដល់ 63% ក្នុងចំណោមអ្នកដែលមានអាយុពី 18-29 ឆ្នាំ។

តើរដ្ឋាភិបាលបារាំងមានសំណើអ្វីខ្លះដល់យុវជនបារាំង?

ប្រទេសបារាំងបានលុបចោលការចូលបម្រើកងទ័ពជាកាតព្វកិច្ចកាលពី 25 ឆ្នាំមុន ហើយបច្ចុប្បន្នមានកងទ័ពសកម្មប្រហែល 200,000 នាក់ និងទាហានបម្រុងចំនួន 47,000 នាក់។

កម្មវិធីថ្មីរបស់ប្រទេសនេះមានគម្រោងណែនាំការចូលបម្រើកងទ័ពដោយស្ម័គ្រចិត្តទៅក្នុងរចនាសម្ព័ន្ធយោធា បុរស និងស្ត្រីវ័យក្មេងនឹងឆ្លងកាត់ការបណ្តុះបណ្តាលយោធាដែលមានប្រាក់ឈ្នួលរយៈពេល 10 ខែ។

កម្មវិធី "បម្រើជាតិ" (national service)ថ្មីនេះនឹងត្រូវដាក់ឱ្យដំណើរការបន្តិចម្តងៗចាប់ពីរដូវក្តៅក្រោយ ដោយផ្តោតលើយុវជនអាយុ 18 និង 19 ឆ្នាំ ដែលនឹងទទួលបានយ៉ាងហោចណាស់ 800 អឺរ៉ូក្នុងមួយខែ។

ដំបូងឡើយ ចំនួនអ្នកចូលរួមនឹងត្រូវបានកំណត់ត្រឹម 3,000 នាក់នៅឆ្នាំក្រោយ ប៉ុន្តែចំនួននេះត្រូវបានគេរំពឹងថានឹងកើនឡើងដល់ 50,000 នាក់នៅឆ្នាំ 2035។

លោកប្រធានាធិបតី Emmanuel Macron ដែលបានប្រកាសផែនការនេះថា "មធ្យោបាយតែមួយគត់ដើម្បីជៀសវាងគ្រោះថ្នាក់គឺត្រូវត្រៀមខ្លួន យើងត្រូវតែធ្វើដើម្បីការពារខ្លួន ដើម្បីត្រៀមខ្លួន និងដើម្បីទទួលបានការគោរព"។

ការស្ទង់មតិបង្ហាញថា សាធារណជនភាគច្រើនគាំទ្រការចូលបម្រើកងទ័ពដោយស្ម័គ្រចិត្ត ការស្ទង់មតិមួយរបស់ Elabe បានរកឃើញថា 73% គាំទ្រវិធានការនេះ ប៉ុន្តែយុវជនដែលមានអាយុពី 25-34 ឆ្នាំមានការគាំទ្រតិចបំផុត។ ទោះជាយ៉ាងណាក៏ដោយ ក៏នៅមានអ្នកក្នុងក្រុមអាយុនេះក៏ដោយ 60% បានគាំទ្រ។

 

តើប្រទេសអឺរ៉ុបផ្សេងទៀតយ៉ាងម៉េចវិញ?

ប្រទេសអឺរ៉ុបផ្សេងទៀតប្រើវិធីសាស្រ្តផ្សេងៗគ្នាក្នុងការដាក់រៀបចំកងកម្លាំងប្រដាប់អាវុធរបស់ពួកគេ ប្រទេសដែលមិនមែនជាសមាជិកណាតូមានដូចខាងក្រោម៖

• ប្រទេសអូទ្រីសមានប្រព័ន្ធសេវាកម្មយោធាជាកាតព្វកិច្ចសម្រាប់បុរសដែលមានអាយុពី 18-35 ឆ្នាំ ដែលតម្រូវឱ្យបំរើជាតិប្រហែល6ខែ ឬជម្រើសផ្សេងមកជំនួស ចំពោះស្ត្រីអាចចូលរួមដោយស្ម័គ្រចិត្តក្នុងជួរកងទ័ពបាន។

• ប្រទេសស៊ីបមានប្រព័ន្ធសេវាកម្មយោធាជាកាតព្វកិច្ចសម្រាប់បុរសទាំងអស់ដែលមានអាយុលើសពី 18 ឆ្នាំ រួមទាំងជនជាតិស៊ីបមួយចំនួនផងដែរ។ ស្ត្រីអាចចុះឈ្មោះចូលបម្រើកងទ័ពបាន ក្រោយពីច្បាប់មួយត្រូវបានអនុម័តដោយសភាកាលពីខែមេសា។

• សាធារណរដ្ឋអៀរឡង់ និងម៉ាល់តាមានកងទ័ពអាជីព។

នៅប្រទេសស្វីស ដែលមិនមែនជារដ្ឋសមាជិកនៃសហភាពអឺរ៉ុប ពលរដ្ឋបុរសដែលមានអាយុចន្លោះពី 18-30 ឆ្នាំត្រូវបានតម្រូវឱ្យបម្រើក្នុងជួរកងទ័ព ការពារជនស៊ីវិល ឬសេវាស៊ីវិលជំនួស។

កាលពីសប្តាហ៍មុនស្វីស មានអ្នកបោះឆ្នោតបានបដិសេធសំណើមួយដើម្បីពង្រីកសេវាជាតិដើម្បីរួមបញ្ចូលស្ត្រីក្នុងជួរកងទ័ព ការពារជនស៊ីវិល និងសេវាយោធាផ្សេងទៀត។

ប្រភព ៖ BBC

អត្ថបទ ៖ #សេនាមេឃ