ភ្នំពេញ៖ រដ្ឋមន្ត្រីទទួលបន្ទុករដ្ឋលេខាធិការដ្ឋាន អាកាសចរណ៍ស៊ីវិល បានគូសបញ្ជាក់ថា ចំពោះការហោះហើរសាកល្បងនៅថ្ងៃទី១៥ ខែសីហា ឆ្នាំ២០២៥ខាងមុខនេះ គឺជាការហោះហើរសាកល្បងជាលើកចុងក្រោយ ដើម្បីពិនិត្យរាល់ឧបករណ៍បច្ចេកទេសទាំងអស់ ដែលគាំទ្រដំណើរការអាកាសយានដ្ឋានអន្តរជាតិតេជោ មុនដំណើរការជាផ្លូវការ នៅថ្ងៃទី៩ ខែកញ្ញា ។
ថ្លែងប្រាប់អ្នកសារព័ត៌មាន ក្នុងឱកាសអញ្ជើញចុះត្រួតពិនិត្យ លើវឌ្ឍនភាពរបស់អាកាសយានដ្ឋានអន្តរជាតិតេជោ កាលពីថ្ងៃទី១១ ខែសីហា ឆ្នាំ២០២៥ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋាន អាកាសចរណ៍ស៊ីវិល បានលើកឡើងថា កាលពីថ្ងៃទី៤ ខែសីហាកន្លងទៅ រដ្ឋលេខាធិការដ្ឋាន អាកាសចរណ៍ស៊ីវិល បានធ្វើពិធីជាផ្លូវការមួយ ដោយផ្តល់ជាអាជ្ញាបណ្ណ ជូនប្រតិបត្តិករអាកាសយានដ្ឋានអន្តរជាតិតេជោ (CAIC) សម្រាប់អាចដំណើរការធ្វើអាជីវកម្ម ។ ក្នុងន័យនេះ ឯកឧត្តមបណ្ឌិត បញ្ជាក់ថា ការផ្តល់ជូនអាជ្ញាបណ្ណ នៅថ្ងៃទី៤ ខែសីហា កន្លងទៅនេះ គឺមិនមែនផ្តល់ភ្លាម អាចធ្វើដំណើរការអាជីវកម្មភ្លាមនោះទេ គឺទុករយៈពេល១ខែ បន្ទាប់ពីទទួលបានអាជ្ញាបណ្ណ ។ ក្នុងនោះនៅថ្ងៃទី៤ ខែកញ្ញាខាងមុខនេះ គឺអាជ្ញាបណ្ណនឹងចូលជាធរមាន និងមានសុពលភាព ដំណើរការធ្វើអាជីវកម្មជាផ្លូវការបាន ។
សូមបញ្ជាក់ថា គិតមកទល់ពេលនេះ ព្រលានយន្តហោះអន្តរជាតិតេជោ ក្រុងតាខ្មៅ សម្រេចការសាងសង់បាន ១០០% ខណៈព្រលានថ្មីនេះ គ្រោងបើកដំណើរការនៅថ្ងៃទី៩ ខែ កញ្ញាខាងមុខនេះ។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជាព្រលានយន្តហោះលំដាប់ 4F ដែលអាចធ្វើអោយយន្តហោះខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕ វិទ្យុជាតិកម្ពុជា៖ លោក រ៉ាត់ សុវណ្ណ
